बज्जिकाञ्चल संवाददाता,रौतहट,०३ गते जेष्ठ ।
रौतहटके सुकदेव चौकपर दारुके खरिद, बिक्री तथा सेवनपर नियन्त्रण करेके सार्थक प्रयास कएलगेल हए । यमुनामाई गाँओपालिकाके वडा नम्बर १ सुकदेव चौकपर सर्वपक्षीय सहमतिमे मदिराके नियमन करेके निर्णय कएलगेल हए । सुकदेव चौकके आउर व्यवस्थित बनाबेला अइसन निर्णय कएलगेल स्थानीयके कहनाम हए । सुकदेव चौकके जनप्रतिनिधि, बजार समिति, स्थानीय बुद्धिजीवी, प्रहरी चौकी सुकदेव चौकसमेतके संयुक्त बैठकसे सुकदेव चौकपर साँझके ९ बजेतक मात्र मदिरा सेवन, बिक्री तथा खरिद करसकेके निर्णय कएलगेल हए । सुकदेव चौकपर मदिरासे सम्बन्धित सभी दोकान अनिवार्य रुपसे साँझके ९ बजेतक बन्द करदेबेके निर्णय कएलगेल हए । मदिरा पिके रातमे हल्ला करेके, झगडा करेके आ सामाजिक शान्तिमे असर परेके होएलासे अइसन निर्णय कएलगेल स्थानीयवासीके कहनाम हए ।