बज्जिकाञ्चल संवाददाता,रौतहट,१३ गते जेठ ।

देशके राजधानी काठमान्डुमे बज्जिका प्रज्ञा प्रतिष्ठानके आयोजनामे भेल कला आ संस्कृतिसे सम्बन्धित लोगके भेलासे बज्जिका कला समिति गठन कएलगेल हए । बज्जिका प्रज्ञा प्रतिष्ठानके एगो अंगके रुपमे कला आ संस्कृति क्षेत्रके बहुमुखी युवा प्रतिभा सोनु कुशवाहाके अध्यक्षतामे ‘बज्जिका कला समिति’ गठन कएलगेल हए ।

बज्जिका कला समितिके उपाध्यक्षमे विजय यादव निर्बिज, सचिवमे जितेन्द्रराज प्रजापति, सहसचिवमे चन्देश्वर यादव उर्फ चन्दु नेपाली, कोषाध्यक्षमे जयप्रकाश यादव आ सदस्यमे उमेशकुमार यादव, रविन्द्र पटेल तथा गुलाब यादव रहल छत । बज्जिका संस्कृति, गीत, संगीत, नृत्य तथा अन्य पक्षपर समितिके ओरसे औपचारिक कार्यक्रम करेके योजना रहल अध्यक्ष कुशवाहाके कहनाम हए ।

बज्जिका कला आ संस्कृतिके विकास तथा विस्तारके साथे कलाकारके जीवनवृत्ति तथा आत्मसम्मान वृद्धिके लेल बज्जिका कला समिति निरन्तर क्रियाशील रहेके प्रतिबद्धता गायक तथा नायक कुशवाहाके रहल हए ।

बज्जिका कला आ संस्कृतिके सभी क्षेत्रके लोगके समिटइत जाएके आ सभी क्षेत्रके साथे कलाकारके विकासके क्षेत्रमे संस्था निरन्तर सक्रिय रहेको अध्यक्ष कुशवाहाके कहनाम हए । अध्यक्ष कुशवाहा बज्जिका भाषा, साहित्य, कला आ संस्कृतिके सभी शुचचिन्तकसे सकारात्मक सहयोगके अपेक्षा रखले बतएले छत ।