बज्जिकाञ्चल संवाददाता,रौतहट, ७ गते जेष्ठ ।

बज्जिका प्रज्ञा प्रतिष्ठान नेपाल, काठमान्डुके ओरसे पहिल औपचारिक कार्यक्रमके रुपमे सम्मान तथा कृति लोकार्पण कार्यक्रम कएल जारहल हए । इहे जेठ ९ गते सनिचरके दिन सबेरे ७ बजे काठमान्डुके कमलादीस्थित नेपाल प्रज्ञा प्रतिष्ठानके कक्षमे साँसद सम्मान तथा कृति लोकार्पण कार्यक्रम होए जारहल हए ।
बितल २०८२ फागुन महिनामे सम्पन्न संसदीय निर्वाचनसे निर्वाचित प्रतिनिधि सभा सदस्यमध्ये बज्जिका भाषामे शपथ लेबेवाला माननीय साँसदके सम्मानमे कार्यक्रम आयोजना होरहल जनाएलगेल हए । सर्लाही क्षेत्र नम्बर १ से निर्वाचित नितिमा भण्डारी कार्की, सर्लाही क्षेत्र नम्बर २ से निर्वाचित रबिन महतो, सर्लाही क्षेत्र नम्बर ३ से निर्वाचित नरेन्द्र साह कलवार, रौतहट क्षेत्र नम्बर १ से निर्वाचित राजेशकुमार चौधरी आ रौतहट क्षेत्र नम्बर ३ से निर्वाचित रविन्द्र पटेल साँसद पद तथा गोपनीयताके शपथ बज्जिका भाषामे लेले छथिन ।
बज्जिका भाषामे शपथ लेके बज्जिकाके गौरव बढाबेके जइसन काम कएलासे ई महान योगदानके कदर करइत सभी माननीयजीके सामूहिक सम्मान करेला कार्यक्रमके आयोजन कएलगेल आयोजक संस्था बज्जिका प्रज्ञा प्रतिष्ठान नेपालके संयोजक इन्द्रजीत सहनी जानकारी करएले छत । कार्यक्रमके तयारी युद्धस्तरपर चलरहल प्रतिष्ठानके सचिव सबिन खनाल जानकारी करएले छत ।
काठमान्डुमे रहइत आएल बज्जिका मातृभाषी, शुभचिन्तक आ साहित्यकार लोगके कार्यक्रममे उपस्थित रहेके बताएलगेल हए । कार्यक्रममे सहभागी होएला बारा, रौतहट, सर्लाहीके बज्जिकासेवी लोग पुगेवाला हए । अइसही पर्सा आ महोत्तरीसे भी सहभागी पुगेवाला भेल आयोजकके कहनाम हए ।
कार्यक्रममे पाँच माननीय साँसदके सम्मान करेके आ साहित्यकार इन्द्रजीत सहनीद्वारा लिखित नाट्यकृतिके लोकार्पण भी होएवाला हए । अइसही कार्यक्रममे बज्जिका भाषा आ साहित्यसे सम्बन्धित अन्य कृति भी बिक्री वितरण होएवाला हए । बज्जिका भाषा आ साहित्यके दृष्टिसे काठमान्डुमे होरहल सम्मान तथा कृति लोकार्पण कार्यक्रम बहुत महत्त्वपूर्ण मानल जारहल हए ।