बज्जिकाञ्चल  संवाददाता, रौतहट, १५ गते कात्तिक।

दीपावली आ छठ पर्वके अवसर पर सचेत दलित समाज, रौतहटके आयोजनामे शुभकामना आदान प्रदान कार्यक्रम सम्पन्न भेल हए । कार्यक्रममे दलित समुदायके एकता, प्रतिनिधित्व आ अधिकारके मुद्दा पर विशेष चर्चा करईत रौतहटमे दलित संघर्ष समितिके
फेरु गठन करेके निर्णय लेल गेल हए । कार्यक्रममे रौतहट जिल्लाके १८ वटही पालिकासे प्रतिनिधित्व करेवाला दलित अगुवा, सामाजिक अभियन्ता, बुद्धिजीवी आ शुभेच्छुकसबके सहभागिता रहल रहे ।

पर्वके शुभकामना आदान प्रदान के साथे दलित समुदायके वर्तमान अवस्था, सामाजिक एकता, प्रतिनिधित्व आ अधिकारके विषयमे भी विचार विमर्श कएल गेल रहे । कार्यक्रममे कुछ दिन पहिले सीमित व्यक्तिसबके सहभागितामे गठन कएल गेल दलित संघर्ष समिति विवादमे पड़ला के बाद विघटन हो चुकल विषय भी उठल रहे ।

ई समिति के विकल्पमे समग्र दलित समुदायके व्यापक सहभागिता, समान प्रतिनिधित्व आ सामूहिक सहमतिका आधार पर नयां समिति गठन करेके निर्णय कएल गेल हए । ई निर्णय अनुसार आगामी २०८३ साल कात्तिक २४ गते मंगरके दिन गरुडा स्थित अनुपा पार्टी प्यालेसके सभाहलमे दलित संघर्ष समिति, रौतहटके फेरु गठन कएल जाई । फेरु गठन कार्यक्रममे रौतहट जिल्लाके १८ वटही पालिकाके दलित समुदायके अगुवा तथा जनप्रतिनिधिसबके साथे दोसरा जिल्लासे भी दलित समुदायके प्रतिनिधित्व करेवाला जनप्रतिनिधिसबके सहभागिता रहेके जनावल गेल हए ।

नया समिति गठन करेके समय समावेशिता, पारदर्शिता आ समान प्रतिनिधित्व के मुख्य आधार बनावल जाई । दलित समुदायके भीतर रहल सब जाति तथा समूहके उचित सहभागिता सुनिश्चित करईत आवश्यक प्रक्रिया पूरा करके सामूहिक सहमति से समिति फेरु गठन करेके निर्णय भेल हए । दलित समुदायके हक, अधिकार, सम्मान आ सामाजिक न्याय सुनिश्चित करेके लेल व्यक्ति वा समूह विशेषसे ऊपर उठके सामूहिक एकता, आपसी सद्भाव आ साझा नेतृत्व निर्माण करेके जरूरी पर सहभागीसब जोर देले रहलन ।

विभाजन ना, एकतास विवाद ना, सहमति आ भेदभाव ना, सामाजिक न्यायके रास्ता पर सबके एकजुट होए के संदेश भी कार्यक्रम देले हए । एही विषयमे आपन विचार आ जानकारी देईत दलित अधिकारकर्मी तथा रौतहट निर्वाचन क्षेत्र नम्बर ४ के सांसद प्रत्याशी राजकुमार दास तत्मा समग्र दलित समुदायके सहभागिता आ सहमति से नयां समिति गठन करेके आवश्यकता पर जोर देले रहलन । हुनकर कहनाम रहे कि दलित समुदायके हक, अधिकार आ सम्मान लेल सबके एकजुट होके साझा नेतृत्व निर्माण करेके जरूरी हए ।