आरके श्रीवास्तव, रौतहट, १६ गते कार्तिक ।

बारा जिल्लाके फेटा गाउँपालिका–३ में अस्पताल उद्घाटनके विषय केलेके भेल झड़प के दौरान पुलिसके गोली लागके गंभीर रूप से घायल युवक आदित्य पासवानके काठमांडू में इलाज जारी हए । हुनकर इलाज त्रिभुवन विश्वविद्यालय शिक्षण अस्पताल में आईसीयू में राखके हो रहल हए ।

अस्पताल स्रोत के अनुसार, अभी हुनकर अवस्था स्थिर हए । अस्पतालके सूचना अधिकारी कालीप्रसाद रोस्याराके अनुसार, गोली लागके घायल पासवानके आईसीयू में राखल गेल हए आ चिकित्सक लोग निगरानी में इलाज कररहल बाडन । बारा जिल्लाके सहायक प्रमुख जिल्ला अधिकारी छबिरमण भट्टराईके अनुसार, घायल पासवानके एतवारके सबेरे ११ बजके ४० मिनट पर हेलिकप्टर से काठमांडू भेजल गेल रहे ।

हुनकर कमर के नजदीक गोली लागल रहे । चिकित्सक लोग गोली निकाल चुकल हए आ अभी इलाज जारी हए । संघीय सरकार द्वारा निर्माण करावल स्वास्थ्य केन्द्रके उद्घाटन करेके लेल फेटा गाउँपालिका शनिचर के सबेरे कार्यक्रम आयोजना कएले रहे । बाकिर उद्घाटन कार्यक्रम के दौरान विवाद शुरू हो गेल ।

गाउँपालिका अध्यक्ष रुस्तम अन्सारीके विरोध में रहल स्थानीय लोग स्वास्थ्य केन्द्र परिसर में लगावल शिलालेख तोड़फोड़ कर देल, जेकरा बाद विवाद अउरी बढगेल । अध्यक्ष अन्सारीके समर्थक आ विरोधी स्थानीय लोग के बीच विवाद बढके झड़प में बदल गल ।

स्थिति नियंत्रण में लेवे के लेल पुलिस गोली चलएले रहे । ओही दौरान आदित्य पासवान गोली लागके गंभीर रूप से घायल हो गेल रहे । बाद में हुनका बेहतर इलाजके लेल हेलिकप्टर से काठमांडू भेजल गेल हए । फिलहाल अस्पताल में हुनकर इलाज जारी हए । आईसीयू में राखके उपचार हो रहल हए आ अस्पतालके जानकारी अनुसार हुनकर स्वास्थ्य अवस्था स्थिर हए ।