आरके श्रीवास्तव, रौतहट, कार्तिक ७ गते ।

जनता समाजवादी पार्टी जसपा नेपालके केन्द्रीय उपाध्यक्ष आ वरिष्ठ नेता, पूर्वमन्त्री गोविन्द चौधरी संविधानसे सुनिश्चित अधिकार, प्रदेशके पहिचान आ लोकतान्त्रिक आन्दोलनसे मिलल उपलब्धिके रक्षाके लेल सबके एकजुट होएके आह्वान कएले बाड़न रौतहटके गरुडामे अग्रगामी मोर्चाद्वारा आयोजित शुभकामना आदानप्रदान कार्यक्रमके सम्बोधन करईत नेता चौधरी संविधान आ कानुनमे व्यवस्था कएल गेल अधिकारके संरक्षण संघे ओकर प्रभावकारी कार्यान्वयन पर जोर देलन ।

लोकतान्त्रिक आन्दोलनसे मिलल उपलब्धि आसानीसे हासिल नहए भेल, एकर चर्चा करईत हुन कहलन कि एह उपलब्धिके रक्षा करेके लेल सब सचेत, जिम्मेवार आ प्रतिबद्ध होएके जरूरी हए । संविधानसे सुनिश्चित अधिकारके संरक्षण करेके संघे जनता ओ अधिकारके वास्तविक अनुभूति कर सकेके, अइसन वातावरण बनावल जरूरी हए । नेता चौधरी अपना सम्बोधनमे प्रदेशके पहिचान, क्षेत्रीय प्रतिनिधित्व आ जनताके अधिकारके विषयके प्राथमिकता देलन । हुन प्रदेशके पहिचान आ जनताके भावना के सम्मान करईत हुनसबके जरूरी आ अपेक्षा अनुसार काम करेके आवश्यकता पर जोर देलन ।

राजनीतिक संस्कार आ नेतासबके जनताप्रतिके जवाफदेहिताके चर्चा करईत चौधरी कहलन कि राजनीतिक दल आ नेतासब खाली आरोप प्रत्यारोपमे सीमित न रहेके चाहीं । राजनीतिक नेतृत्वके जनता के वास्तविक समस्या पहिचान करके ओकर समाधान करेके दिशा मे काम करेके चाहीं । राजनीतिक दलके नेता आ कार्यकर्तासबके मूल्याङ्कन जनताके कएल गेल काम, व्यवहार आ जिम्मेवारीके आधार पर होएके चाहीं, हुन कहलन । जनताके विश्वास जीतेके लेल नेतासब अपना प्रतिबद्धता के व्यवहारमे उतारेके सन्देश भी देलन ।

एही लेल, नेता चौधरी राजनीतिक दल आ उम्मेदवारसबके जनता से लगातार सम्पर्कमे रहे, अपना विचार, नीति आ योजनाके बारेमे स्पष्ट जानकारी देवे आ जनताके विश्वाबके प्राथमिकता देवेके आग्रह कएलन । आगामी निर्वाचनके सन्दर्भमे हुन पार्टीके नेता, कार्यकर्ता आ उम्मेदवारसबके आपसी सम्पर्क आ समन्वय बनाके आगे बढेके आह्वान कएलन ।

संगठनात्मक एकता, आपसी सहयोग आ जनतासे सम्बन्ध मजबूत बनाके आगे बढ़ेके जरूरी पर हुन जोर देलन । कार्यक्रमके अन्तमे नेता चौधरी उपस्थित सब लोगके अभिवादन करईत शुभकामना व्यक्त कएलन । अग्रगामी मोर्चाद्वारा आयोजित ई कार्यक्रममे आम जनता पार्टीके केन्द्रीय अध्यक्ष आ पूर्वमन्त्री प्रभु साह, जनता समाजवादी पार्टीके केन्द्रीय उपाध्यक्ष आ पूर्वमन्त्री गोविन्द चौधरी, आम जनता पार्टीके महासचिव त्रिभुवन साह, केन्द्रीय सचिव विजय यादव ‘निर्विज’, जसपाके नेता आ पूर्वराज्यमन्त्री योगेन्द्र राय यादव, जसपाके कार्यकारिणी सदस्य आ पूर्वप्रदेश सांसद रामकिशोर यादव, जनमत पार्टीके कार्यकारिणी सदस्य रामलाल यादव लगायत अग्रगामी मोर्चाके अलग अलग तहके नेता आ कार्यकर्तासबके उपस्थिति रहल रहे ।

कार्यक्रममे सहभागी नेता आ कार्यकर्तासबके उपस्थितिके बारेमे आम जनता पार्टीके सचिवालय सदस्य रामशरण यादव जानकारी देलन ।