सागर संगम ठाकुर, रौतहट, कार्तिक ७ गते ।

रौतहटके कटहरियासे प्रसारित होए वाला बज्जिकाञ्चल एफएम ८९.२ मेगाहर्ज पर हर शनिचर प्रसारित होए वाला लोकप्रिय बौद्धिक कार्यक्रम ‘ब्रेन चेक’ के विजेता निरज यादव के पुरस्कार देल गेल हए ।

पिछला शनिचर के कार्यक्रम मे बढ़िया प्रदर्शन करके विजेता बनल कटहरिया नगरपालिका–३, बडेरवा निवासी निरज यादव के शुकरके एक कार्यक्रम के बीच पुरस्कार प्रदान कएल गेल हए । हर शनिचरके सबेरे ११ बजे से १२ बजे तक प्रसारित होए वाला ‘ब्रेन चेक’ कार्यक्रम मे बाल कल्याण विद्या मन्दिर कटहरिया के ओर से पुरस्कार देल जाईअ ।

विजेता यादव के बज्जिकाञ्चल मिडिया प्रा.लि. के ओर से विवेक यादव आ बाल कल्याण विद्या मन्दिर कटहरिया के प्रतिनिधि संयुक्त रूप से पुरस्कार प्रदान कएलन । ई तरह के ज्ञानवर्धक कार्यक्रम विद्यार्थी आ युवासब के सामान्य ज्ञान, तर्कशक्ति आ आत्मविश्वास बढ़ावे मे महत्वपूर्ण भूमिका निभावेला, ई विश्वास एफएम के प्रबन्ध निर्देशक सरिता कुमारी श्रीवास्तव व्यक्त कएलन ।

रेडियो के माध्यम से स्थानीय प्रतिभा के पहिचान करके प्रोत्साहित करेके काम सकारात्मक रहल, कार्यक्रम मे उपस्थित लोग बतएलन । ‘ब्रेन चेक’ कार्यक्रम के प्रस्तोता जयलाल प्रसाद यादव छत ।

कार्यक्रम मे अलग अलग विषय से जुड़ल ज्ञानवर्धक आ बौद्धिक सवाल शामिल कएल जाईअ । एहिसे विद्यार्थी आ श्रोतासब के बीच ई कार्यक्रम लोकप्रिय बनरहल हए ।

बज्जिकाञ्चल एफएम स्थानीय विद्यार्थी आ युवासब के प्रतिभा के पहिचान करके प्रोत्साहित करेके उद्देश्य से अईसनके सहभागितामूलक कार्यक्रम लगातार सञ्चालन करईत आ रहल हए ।