आरके श्रीवास्तव, रौतहट, ११ गते कार्तिक ।

रौतहट । रौतहटके दक्षिणी भेगमे रहल ईशनाथ नगरपालिकामे अगुवा किसानसभके प्राविधिक ज्ञान, व्यावहारिक सीप आ एक किसानसे दोसर किसान तक ज्ञान पहुँचावेके क्षमता विकास करेके उद्देश्यसे दू दिने ‘अगुवा किसानसभके क्षमता विकास आ जलवायु–स्मार्ट कृषि प्रविधि प्रवर्द्धन’ तालिम सम्पन्न भेल हए ।

संरक्षण नेपालके आयोजनामे, साझेदार संस्था केयर आईडी नेपाल आ केयर नेपालके सहकार्य तथा ईशनाथ नगरपालिकाके समन्वयमे ई तालिम सञ्चालन  कएल गेल हए ।

जलवायु परिवर्तनसे पैदा होखे वाला चुनौतीके सामना करइत टिकाउ, पोषणके ध्यानमे रखके आ एकीकृत कृषि प्रणालीके बढ़ावा देवेके उद्देश्यसे आयोजित एह तालिममे पहिलका दिने २२ गो अगुवा किसान सहभागी भेल रहलन ।

तालिममे जलवायु–स्मार्ट कृषि प्रविधि, पोषण–संवेदनशील कृषि अभ्यास, एकीकृत कृषि प्रणालीके प्रभावकारी प्रयोग आ उत्कृष्ट प्रदर्शन प्लटके सिकाइ केन्द्रके रूपमे विकसित करेके विषयमे जानकारी देहल जा रहल हए ।

एकरा साथे एक किसानसे दोसर किसान तक ज्ञान आ सीप पहुँचावे, किसान समूह तथा एचएमजी सदस्यसभमे उन्नत कृषि प्रविधिके विस्तार करे आ सामुदायिक तालिम सञ्चालन करे खातिर अगुवा किसानसभके क्षमता बढ़ावे पर विशेष जोर देल गेल हए ।

दू दिन तक चले वाला एह तालिमके पहिलका दिने बिहान ८ बजेसे साँझ ५ बजे तक सैद्धान्तिक सत्र आ दोसरा दिने बिहान १० बजेसे साँझ ५ बजे तक व्यावहारिक सत्र सञ्चालन करेके कार्यक्रम रहल हए । सैद्धान्तिक सत्रमे मिलल ज्ञानके व्यावहारिक अभ्यासके माध्यमसे अपना खेतबारीमे प्रयोग करेके क्षमता बढ़ावल तालिमके मुख्य उद्देश्य हए ।

तालिमके सहजीकरण कृषि अधिकृत सन्दीप तिमल्सिना कर रहल बाड़न । ओही सही कार्यक्रममे जेसी अफिसर नितु कुमारी मल्लिक अगुवा किसानसभके जोखिमसे बचावेकेसम्बन्धी अभिमुखीकरण सत्र सञ्चालन कएले छथिन

एह सत्रमे तालिम आ सामुदायिक गतिविधिके दौरान सुरक्षित, सम्मानजनक, समावेशी आ जिम्मेवार व्यवहार अपनावेके महत्वबारे जानकारी देहल गेल ।

तालिमके सञ्चालन, सहजीकरण आ व्यवस्थापनमे फिल्ड सहजकर्तासभ भी महत्वपूर्ण सहयोग कएले बाड़न । कार्यक्रममे स्थानीय तहके कृषि प्रतिनिधि आ पत्रकारसभके उपस्थिति पर भी जोर देल गेल हए ।

एहसे कृषि प्रविधिके प्रचार–प्रसार, स्थानीय सरोकारवाला सभके बीच समन्वय आ कार्यक्रमसे मिलल उपलब्धिके जानकारी आम लोग तक पहुँचावेमे सहयोग मिलेके अपेक्षा कएल गैल हए ।

ई कार्यक्रम भदौ महिनाके आखिरी सप्ताहसे शुरू भेल हए आ कात्तिक १३ गते तक पाँच गो पालिकामे सञ्चालन करेके योजना बनावल गेल हए ।

कार्यक्रमके माध्यमसे स्थानीय कृषि तथा पशु सेवा कार्यालय, कृषि ज्ञान केन्द्र, परियोजना आ किसान समुदायके बीच प्राविधिक समन्वय मजबूत बनावेके लक्ष्य रखल गेल हए । एकरा साथे जलवायु–स्मार्ट आ एकीकृत कृषि प्रणालीके विस्तारमे योगदान पुगेके विश्वास कएल गेल हए ।

तालिमसे मिलल ज्ञान आ सीप अपना खेतबारीमे प्रयोग करेके साथे दोसर किसानसभ तक पहुँचावे खातिर अगुवा किसानसभके प्रेरित कएल जाई । एहसे स्थानीय स्तर पर उन्नत कृषि प्रविधि अपनावेके चलन बढ़े, सिकाइ केन्द्र विकसित होखे आ टिकाउ तथा जलवायु परिवर्तनके असर झेलेमे सक्षम कृषि प्रणालीके निर्माणमे सहयोग पुगेके अपेक्षा कएल गेल हए ।