सागर संगम ठाकुर, रौतहट, असोज ३० गते।

रौतहटके देवाही गोनाही नगरपालिका–५, टिकुलियाके वडाध्यक्ष उपेन्द्र साह कानु वडाके विकास निर्माणके कामके लेल नगरपालिकासे अपेक्षित सहयोग न मिल रहल गुनासो कएले हए । सड़क, सिंचाई, विद्यालय आ मठ(मंदिरके विकास लेल प्रयास कएला परो आर्थिक स्रोतके कमीसे कई गो योजना अधूरे रह गेल हए । मंगर के देले बज्जिकाञ्चल एफएम ८९.२ मेगाहर्जके कार्यक्रम ‘बज्जिकाञ्चल बहस’ में प्रस्तोता सागर संगम ठाकुरसे बातचीत करईत वडाध्यक्ष साह कहलन कि सीमित स्रोत(साधन रहला परो स्थानीय लोगके सहयोग से विकास निर्माण आ सामाजिक सेवाके काम आगे बढ़ावल जा रहल हए ।

हुनकर कहनाम अनुसार टिकुलिया समेत वडाके अलग अलग बस्ती आ टोल में सड़क सुधार, माटी आ ग्राभेल डाले तथा सड़क ढलान करेके काम भेल हए । बाकिर जरूरी बजटके कमीसे वडाके सब जगह सड़क सुधार करे संभव न हो सकल हए । खास करके कटहरियासे टिकुलियाके नारायण चोक तक जाएवाला सड़कके हालत बहुते खराब हए । वडाध्यक्ष साहके कहनाम हए कि सड़क निर्माण करेवाला ठेकेदारके लापरवाहीसे स्थानीय लोगके परेशानी झेले पड़ रहल हए ।

हुनकर अनुसार ई सड़कके कालोपत्र करेके ठेका कई साल पहिले लागल रहे, बाकिर निर्माणके काम समय पर पूरा न भेल । सड़क निर्माण में देरी होखला से बरसात के समय कीचड़ आ बाकी समय गड्ढा के चलते लोगके आवागमन में दिक्कत हो रहल हए । गाँवके मुख्य सड़क कालोपत्र करेके ले रौतहट क्षेत्र नम्बर–३ के पूर्व सांसद प्रभु साहके ध्यानो खींचल गेल, बाकिर अब तक अपेक्षित प्रगति न हो सकल हए । वडाध्यक्ष साह कहलन कि सड़क बनावे लेल कई बेर पहल कएल गेल, बाकिर संबंधित निकाय से समस्या समाधान के दिशा में ठोस काम न भेल। अब ऊ एह मुद्दा पर अउरी मजबूती से लागेके बात कहलन ।