रामअधार यादव , रौतहट, १० गते असोज ।
रौतहट । रौतहट के कटहरिया नगरपालिका–५ स्थित पोखरी लग पानिके निकास लेल सड़क काटला के बाद पिपरा–पोखरिया सड़क पर आवईत जाईतमे समस्या हो रहल हए। नाला के पानी सड़क पर बहला से सड़क कटान होएला के साथे हिलो आ पानी जमल रहला के कारण स्थानीय लोग के आवईत जाईत करे मे कठिनाई हो रहल हए।

कटहरिया गाँव से बाहर निकलते ही पड़ल पोखरी लग पानी निकास लेल सड़क काटल गेल हए। ई सड़क पिपरा, पोखरिया, डुमरिया आ बगही लगायत के गाँव सभके जोड़ेले । एहिसे कटहरिया नगरपालिका के वडा नं। ७, ८ आ ९ के स्थानीय लोग लेल ई महत्वपूर्ण आवईत जाईत के मार्ग रहल हए। सड़क काटल गेला के बाद अभी ओह जगह पर पानी आ हिलो जमल रहला से पैदल चलेवाला, साइकल आ मोटरसाइकल चालक सभके आवईत जाईतमे समस्या हो रहल हए।

खास करके विद्यालय जाए वाला बालबालिका सभ जोखिममे पड़ल हए। हिलो के कारण मोटरसाइकल चिप्लके दुर्घटना होखे के जोखिम बढ़ल स्थानीय लोग बतएले हए । स्थानीय पूर्व वडा सदस्य बाबूलाल राय यादव बतएले कि नाला के पानी सड़क पर बहला से सड़क कटान हो रहल हए आ हिलो जमला से दैनिक आवईत(जाईत प्रभावित भेल हए।

हुनके नगर प्रमुख, वडा जनप्रतिनिधि आ सम्बन्धित निकाय से स्थलगत निरीक्षण करके समस्या के तत्काल समाधान करे के माग कएले हए । स्थानीय लोग के अनुसार पानी निकास लेल सड़क काटल जरूरी रहे, बाकिर सड़क काटला के बाद ओकरा के फेर से व्यवस्थित नहए कएल गेल हए ।

एहसे समस्या आउर बढ़ल गेल हए। ओह जगह पर ह्युमपाइप लगावे के साथे एक–दुई टेलर ग्याभियन के व्यवस्था करके पानी के निकास व्यवस्थित करे आ सड़क सुचारु करे के स्थानीय लोग सुझाव देले हए । ओही तरह स्थानीय लोग नाला आ पाइप के काम प्रभावकारी भेल कि नहए, ओकरो जाँच करे के माग कएले हए ।