आरके श्रीवास्तव, रौतहट, असोज ९ गते ।

रौतहटके कटहरियासे प्रसारण होईत आएल बज्जिकाञ्चल एफएम ८९.२ मेगाहर्ज स्टुडियोमे सीमित रहल अपन प्रसारणके विस्तार करईत गाव–गाव टोला–टोला आ चोक–चोकमे पहुँचके श्रोता आ स्थानीय नागरिकसबसे प्रत्यक्ष संवाद करेवाला अभियानके निरन्तरता दे रहल हए ।

क्यूरी मसालाके प्रायोजन आ कटहरियास्थित निराला जेनरल स्टोरके सहकार्यमे एफएम हरेक शुकरके दुपहर ३ः१५ बजेसे ४ बजेतक ‘क्यूरी संवाद’ कार्यक्रम सञ्चालन करईत आएल हए । ओही क्रममे शुकरके रौतहटके वृन्दावन नगरपालिका–८, बहुअरीमे कार्यक्रम आयोजना कएल गेल हए ।

कार्यक्रमके प्रस्तोता राजेश निर्माणी रहलन जबकि बज्जिकाञ्चल एफएमके सम्पूर्ण टोली कार्यक्रममे सहकार्य कएले रहलन । कार्यक्रममे सहभागी स्थानीय श्रोता सबसे दैनिक भान्सामे प्रयोग होए वाला सामग्री, खाना पकावेके तरीका आ क्यूरी मसालासे सम्बन्धित विभिन्न प्रश्न पूछल जाईअ ।

सही उत्तर देवेवाला श्रोतासबके क्यूरी मसालाके ओरसे तत्काल पुरस्कार सेहो प्रदान कएल गेल जाले । मनोरञ्जनके साथे दैनिक जीवनमे उपयोगी जानकारी देवेके उद्देश्यसे कार्यक्रम सञ्चालन कएल जा रहल एफएम जनएले हए ।

कार्यक्रममे मुकेश साह, महिन्द्र पासवान, समरित राम, विगन पासवान, सुरज पासवान, विकेश साह लगायत करिब २० जना स्थानीय श्रोताके सहभागिता रहल रहे ।

बज्जिकाञ्चल मिडिया प्रा.लि. आ बज्जिकाञ्चल एफएम ८९.२ मेगाहर्जके सञ्चालक आरके श्रीवास्तव एफएम स्टुडियोसे मात्र नभेल प्रत्यक्ष रूपमे जनताके बीचमे पहुँचके उहाँसबके बात सुनेके आ स्थानीय समुदायसे प्रत्यक्ष सम्बन्ध कायम करेके उद्देश्यसे कार्यक्रम सुरु कएल गेल बतएलन ।

हुनके अनुसार बहुअरीमे आयोजित कार्यक्रमके प्रत्यक्ष प्रसारण सेहो बज्जिकाञ्चल एफएमसे कएल गेल । एफएमके प्रबन्ध निर्देशक सरिता कुमारी श्रीवास्तव सञ्चारमाध्यमके वास्तविक शक्ति जनतासे रहल प्रत्यक्ष सम्बन्धमे होएके बतवईत गाव–टोलामे पहुँचके श्रोतासबके कार्यक्रमसे जोडेके प्रयास कएल जा रहल जानकारी देलन ।

ओही लेखा क्यूरी मसालाके बिजनेस पार्टनर आ निराला जेनरल स्टोर कटहरियाके सञ्चालक महाशक्ति निराला स्थानीय उपभोक्ता आ श्रोतासबसे प्रत्यक्ष रूपमे जुड़ेके मौका मिलल कार्यक्रमके महत्वपूर्ण पक्ष रहल बतएलन ।

हुन कहलन कि क्यूरी मसालाके गुणस्तर आ प्रयोगके बारेमे जानकारी उपभोक्तातक पहुँचावेके साथे मनोरञ्जनात्मक कार्यक्रममार्फत स्थानीय समुदायसे आत्मीय सम्बन्ध कायम करेके उद्देश्यसे बज्जिकाञ्चल एफएमसंघे सहकार्य कएल गेल हए ।