बज्जिकाञ्चल संवाददाता,रौतहट,१७ गते वैशाख ।

सामुदायिक विद्यालयके ओरसे भर्ना अभियान संचालन होरहल हए । नेपाल सरकारके निर्देशन तथा नीति अनुसार बैसाख १५ गतेसे करिब सभी सामुदायिक विद्यालय विद्यार्थी भर्ना अभियान संचालन कएले हए । विद्यालयके बैनर आ अन्य सामग्रीसहित शिक्षकलोग समुदायमे जाके घरघरमे बालबालिकाके भर्ना कराबेला अभिभावकसे कहरहल देखलगेल हए ।

विद्यालयके विशेषता, पढाइ होखेक ग्यारेन्टी, सरकारसे मिलरहल सुविधा आदिके विषयमे अभिभावकके साथे अन्तरक्रिया करइत, अभिभावकके बात आ समस्याके सुनइत शिक्षकलोग सम्भव होएलातक अभिभावकमे रहल सामुदायिक विद्यालयके विषयमे भ्रमके चिरहरल हए ।

अभिभावके घरतक पुगलासे विद्यालय समुदाय सम्बन्ध सकारात्मक होरहल हए । साथमे विद्यालयमे पढरहल विद्यार्थीके अभिभावकसे भी भेटघाट होएलासे पढाइके विषयमे छलफल होरहल देखलगेल हए । विद्यालय आ समुदायके समन्वयसे सामुदायिक विद्यालयमे विद्यार्थी भर्नाके अभियानमे उत्साह देखलगेल हए ।

उत्साहित अभिभावक अपना बालबालिकाके विद्यालयमे भर्ना कररहल देखलगेल हए । संस्थागत विद्यालयके छोडके बहुतेक अभिभावक अपना बालबालिकाके सामुदायिक विद्यालयमे भर्ना कररहल देखलगेल हए । सामुदायिक विद्यालयमे बैसाख २१ से नियमित पठनपाठन होखेके बताएलगेल हए ।

एसे पहिले संस्थागत विद्यालयमध्ये कुछमे बैसाख १६ गतेसे पठनपाठन सुरु कएलगेल हए । शनिवार आ आइतवार मिलाके दू दिन छुटी होएलासे पाठयक्रमके समायोजन कके पूरा कोर्स पढाबेला दबाब परल कहइत कुछ संस्थागत विद्यालय पठनपाठन सुरु कएले देखलगेल हए । जिलाके साथे देशभरके करिब सारा सामुदायिक विद्यालय बैसाख २१ से एकसाथ नयाँ शैक्षिक सत्रके औपचारिक पठनपाठन सुरु कररहल हए ।