बज्जिकाञ्चल संवाददाता,रौतहट,०४ गते वैशाख । 

रौतहटके वृन्दावन नगरपालिकाके अवैध संरचनापर डोजर चलएले हए । वृन्दावन नगरपालिकाके निर्माणाधीन नगरपालिका भवनके आसपासके जमिनके हडपके कुछ लोग घर बनएले रहे । सार्वजनिक जमिनके हापके बनएले घरके हटाबेला नगरपालिकाके ओरसे सुचना जारी कएलापर भी नमानेके कारण डोजर लगाके घर तोेडेके काम कएलगेल हए । वृन्दावन नगरपालिकाके नगर प्रमुख विनोद पटेल सार्वजनिक जमिनके अतिक्रमण कके निर्माण कएलगेल संरचनाके खाली करेके काम सुरु कएलगेल बतएले छत । वृन्दावन नगरपालिका २ अन्तर्गत निर्माणाधीन प्रशासनिक भवनके स्वामित्वमे रहल सरकारी जमिनके उपर अबैध कब्जाके हटाबेके काम भेल हए । उक्त जमिन खाली करेला पहिले समुदायमे छलफल भेल मगर जमिन हडपले लोग ही अदालतमे पुगलापर अदालत ऊ जमिनके खाली करेके आदेश देले रहे । नगरपालिकाके निर्णय आ अदालत समेतके आदशेक मानइत अन्ततः कडा कदम चालेके बाध्यता बनल नगर प्रमुखके कहनाम हए । सार्वजनिक सम्पत्तिमे कएलगेल अतिक्रमण कौनो भी हालतमे स्वीकार नहोएके सन्देश सहित कारबाही अगाडि बढाएलगेल हए । नगरपालिकाके ओरसे डोजर चलाएल गेल बातके लेके वृन्दावन नगरपालिकामे बहुत बहस चलरहल हए । स्थानीय नेपाल माविके बिघोबिघा जमिन भी कुछ लोग बलजोरी घर बनएले कहइत उहो जमिनके खाली कराबेके माग कुछ लोग कर रहल हए ।

वृन्दावन नगरपालिकाके ओरसे सार्वजनिक जमिन खाली करेके कदम चालल गेलापर अन्य पालिकामे भी लोगमे डर समाएल हए । सार्वजनिक जमिनके खाली करेला नेपाल सरकारके ओरसे सभी पालिकाके आदेश आचुकल आ वृन्दावन नगरपालिका कार्यान्वयन समेत करारहल अवस्थामे सरकारी जमिन हडपले लोगमे त्रास फैलल हए । जिलाके करिब सभी पालिकामे कुछ गाँओमे सरकारी जमिन हडपाएल हए ।