बज्जिकाञ्चल संवाददाता,रौतहट,०४ गते बैशाख ।

मधेश आन्दोलन होएला दश बरस बितलाके बाद भी एक जने आन्दोलनकारी अपन इलाज करारहल हए । २०७२ सालमे जारी भेल नेपालके संविधानके विरोधमे सुरु भेल दुसरकार मधेश आन्दोलनमे पुलिसके गोली लागके घाएल भेल बारा जिलाके एक आन्दोलनकारीके अभी भी इलाज चलरहल हए । बारा जिलाके परवानीपुरके मन्सी पटेलके इलाज अभी भी दयनीय अवस्थामे चलरहल हए ।

कभी घरमे त कभी अस्पतालमे रहइत आएल मधेश आन्दोलनके योद्धा मन्सी पटेलके इलाज पछिलका समयमे नारायणी अस्पतालसे लेके काठमान्डुमे रहल ट्रमा सेन्टर आ वीर अस्पतालमे चलरहल हए । नारायणी अस्पतालके सुझाव रहल हए कि वीर अस्पताल चाहे ट्रमा सेन्टरमे इलाज करेके । आर्थिक अवस्था कमजोर होएलासे पटेल घरेमे रहेपर बाध्य बनल छत ।

कम्मरसे निचाके भाग नचलेके समस्यासे ग्रस्त पटेल चौबिसो घन्टा बिछौना चाहे ह्वील चेयरपर रहेके बाध्य होएलासे पटेल बेडसोलके समस्यासे ग्रसित रहल छत । हुन थप स्वास्थ्य समस्यासे ग्रसित बनइत जारहल चिकित्सक लोगके कहनाम हए । बोखार आबेके, उक्छाल होखेके, खाना नपचेके जइसन समस्यासे पटेलके स्वास्थ्य अवस्था दिन पर दिन खराब होइते जारहल हए । २२ बरसके उमरमे गोली लागके चलफिर कर नसकेके अवस्थामे पुगल पटेलके उचित इलाज नहोएलासे जीवनबसरमे दिक्कत होइत आएल हए । चार भाइमे पटेलके चार कटा जमिन आ घडारी मात्र रहल प्रतीक दैनिकमे खबर प्रकाशित हए ।