सागर संगम ठाकुर, रौतहट, कार्तिक १४ गते ।

स्थानीय समुदायसे सीधा संवाद स्थापित करेके उद्देश्यसे बज्जिकाञ्चल एफएम ८९.२ मेगाहर्ज द्वारा सञ्चालन होईत आएल ‘क्यूरी स्वाद संवाद’ कार्यक्रम बाराके कोल्हवी नगरपालिका स्थित कोल्हवी बजारमे सम्पन्न भेल हए ।

शुकरके कोल्हवीके तरकारी बजारमे आयोजित कार्यक्रममे स्थानीय श्रोतासबके उत्साहजनक सहभागिता रहल रहे । कटहरियासे प्रसारण होईत आएल बज्जिकाञ्चल एफएम अपन प्रसारणके स्टुडियो तक सीमित न राखके गाँव, टोल आ बजार तक पहुँचावेके अभियान अन्तर्गत ई कार्यक्रम सञ्चालन कएले रहे ।

क्यूरी मसालाके प्रायोजन आ कटहरिया स्थित निराला जेनरल स्टोरके सहकार्यमे हरेक शुकरके दुपहर ३ः१५ बजेसे ४ बजे तक ई कार्यक्रम प्रसारण होईत आएल हए । कार्यक्रमके प्रस्तोता राजेश निर्माणी स्थानीय श्रोतासबसे सीधा बातचीत करईत रोजाना रसोईमे प्रयोग होए वाला सामग्री, खाना बनावेके तरीका आ क्यूरी मसालासे जुड़ल विभिन्न सवाल पूछले रहलन ।सवालके सही जवाब देवे वाला सहभागीसबके क्यूरी मसालाके ओरसे तुरन्त पुरस्कारो प्रदान कएल गेल रहे ।

मनोरञ्जनके माध्यमसे उपयोगी जानकारी देलन कार्यक्रमके मुख्य उद्देश्य रहल आयोजक जनएले हए । कार्यक्रम सञ्चालनमे बज्जिकाञ्चल एफएमके सञ्चालक आरके श्रीवास्तव, स्टेशन म्यानेजर सागर संगम ठाकुर, सम्पादक रामअधार यादव आ प्राविधिक चन्दन यादव लगायतके टोली सदस्य सहयोग कएले रहलन । क्यूरी स्वाद संवाद’ कार्यक्रममे मुर्की पलियाके सन्दीप पण्डित, धरिक्षण पण्डित, राकेश कुमार पण्डित, कोल्हवीके धर्मेन्द्र चौधरी, कटहरियाके मोतिलाल साह, शिवशंकर साह, अमवाटोनवाके गुड्डु धनकार, राजन धनकार, रमपुर्वाके सुगान्धी चौधरी, दुधिअवाके रामबाबु साह, हिमालीवासके रामसुरत कुशवाहा आ सिघासनी बैरियाके बासुदेव पटेल लगायत स्थानीय श्रोतासब कार्यक्रममे भाग लेके क्यूरी मसालाके पुरस्कार जीतले रहलन ।

बज्जिकाञ्चल मिडिया प्रा.लि. आ बज्जिकाञ्चल एफएमके सञ्चालक आरके श्रीवास्तव कहलन कि रेडियोके भूमिका समाचार आ मनोरञ्जन प्रसारण करे तक सीमित न बलकि जनताके आवाज सुने आ ओहनीके समस्या, अनुभव आ विचारके प्राथमिकता देले हए । स्थानीय नागरिकसबसे सीधा सम्बन्ध स्थापित करेके उद्देश्यसे एफएम समुदायकेन्द्रित कार्यक्रमके निरन्तरता दे रहल हुन बतएलन ।

हुन एसे पहिले प्रेमपुर गोनाही बजारोमे एइसने कार्यक्रम आयोजना करके बज्जिकाञ्चल एफएमसे सीधा प्रसारण कएल जानकारी देलन । एफएमके प्रबन्ध निर्देशक सरिता कुमारी श्रीवास्तव कहलन कि सञ्चारमाध्यमके वास्तविक प्रभाव जनतासे नजदीकी सम्बन्ध पर निर्भर करेला । एसे श्रोतासबके हुन अपन गाँव आ टोलामे पहुँचके कार्यक्रमसे जोड़ेके प्रयास कएल जा रहल हए ।

ओही लेखा क्यूरी मसालाके बिजनेस पार्टनर आ निराला जेनरल स्टोर कटहरियाके सञ्चालक महाशक्ति निराला कहलन कि स्थानीय उपभोक्ता आ श्रोतासबसे सीधा सम्पर्क स्थापित करेके दृष्टिकोणसे ई कार्यक्रम प्रभावकारी बनल हए । क्यूरी मसालाके गुणवत्ता आ प्रयोगके बारेमे उपभोक्तासबके जानकारी देवेके साथे मनोरञ्जनात्मक गतिविधि मार्फत स्थानीय समुदायसे आत्मीय सम्बन्ध बढ़ावेके उद्देश्यसे एफएमके साथ सहकार्य कएल गेल हुन स्पष्ट कएलन ।

जे

स्थानीय श्रोतासबसे सीधा बातचीत, सवाल जवाब आ पुरस्कार वितरणके समेटले ‘क्यूरी स्वाद संवाद’ कार्यक्रमसे रेडियो आ समुदायबीचके सम्बन्ध आउरी मजबूत होएके अपेक्षा कएल गेल हए । बज्जिकाञ्चल एफएम आगामी दिनोमे विभिन्न जगह पहुँचके एइसन कार्यक्रमके निरन्तरता देवेके जनएले हए ।