सागर संगम ठाकुर, रौतहट,

असोज १६ गते । रौतहटके गढीमाई नगरपालिका–४ संग्रामपुर निवासी रेडियो श्रोता एटलान्टिक सागर चौधरी अर्थात् एटलान्टिक चौधरी मोबाइल आ अनलाइनके विस्तारके साथे रेडियो सुनेके माध्यम बदलला के बादो एफएम रेडियोके महत्व कायम रहल बतए छत । हुन बज्जिकाञ्चल एफएम छोट समयमे लोकप्रिय होएमे सफल भेल दाबी कएले हए । शुकरके बज्जिकाञ्चल एफएमके ‘बज्जिकाञ्चल बहस’ कार्यक्रममे प्रस्तोता आरके श्रीवास्तवसे बातचित करईत चौधरी ई बात बतएलन ।

चौधरीके अनुसार हुन २००८ सालसे रेडियो सुनईत आएल छत । बज्जिकाञ्चल एफएम ८९.२ मेगाहर्ज छोट समयमे विभिन्न वर्ग आ समुदायके समेटके कार्यक्रम सञ्चालन करहलासे श्रोता सबके मन जितेमे सफल भेल हए । हुन एफएमके कार्यक्रमके खुलके प्रशंसा कएले हए । बहस कार्यक्रममे अतिथिके रूपमे सहभागी चौधरी आपन लमहर रेडियो यात्राके स्मरण करईत आकाशवाणी अल इन्डिया रेडियो लगायत विभिन्न रेडियोके कार्यक्रम सुनला आ पत्रमार्फत कार्यक्रममे सहभागी भेला के अनुभव सुनएलन ।

नेपालमे एफएम रेडियोके विस्तार भेला के बादसे विभिन्न एफएमके कार्यक्रमसे जोडइत आएल बतवईत हुन पुरान समयमे पाँच–सात जने परिवार आ साथीभाइ एके जगह बैठके रेडियो सुनेके संस्कृति रहल स्मरण कएले छत । अभि मोबाइल, अनलाइन आ सामाजिक सञ्जालके माध्यमसे मन लागल समयमे रेडियो आ कार्यक्रम सुनेके सुविधा भेल हुनकर कहनाम हए । बज्जिकाञ्चल एफएम फेसबुक, युट्युब, टिकटकलगायत डिजिटल माध्यमसे श्रोता सबके जोड रहल प्रयास सकारात्मक रहल चौधरी बतएले हए ।

विदेशमे रहल श्रोता सभो प्रत्यक्ष प्रसारण, कमेन्ट आ सन्देशमार्फत कार्यक्रमसे जोड सकेके रेडियोके पहुँच आउर अलग भेल हुनकर कहनाम हए । चौधरीके अनुसार बज्जिकाञ्चल एफएम मनोरञ्जनके साथे समाचार, राजनीतिक आ सामाजिक विषय, विद्यार्थी लक्षित कार्यक्रम, प्रतिभा देखावेके अवसर आ पुरस्कार वितरण जइसन कार्यक्रम सञ्चालन कररहल हए । एहिसे विभिन्न वर्गके श्रोता सबके सहभागिता बढावेमे सहयोग पुगरहल हुन बतएलन । विशेष रूपमे विद्यार्थी लक्षित कार्यक्रम आ पुरस्कार वितरणसे विद्यार्थीमे उत्साह बढरहल चौधरीके धारणा हए । हुन एफएम आगामी दिनमे मनोरञ्जन, सूचना आ जनसरोकारके विषयके सँघेसँघे आगाडी बढावेके सुझाव देलन ।

बज्जिकाञ्चल एफएमके अवरी जनमुखी बनावेके लेल राजनीतिक दल, जनप्रतिनिधि, सामाजिक संस्था आ विभिन्न समुदायसे संवादके निरन्तरता देवेके जरूरी रहल चौधरी बतएलन । मनोरञ्जनात्मक कार्यक्रमके साथे श्रोता सबके दैनिक जीवनसे प्रत्यक्ष जोडल विषयके प्राथमिकता देलापर एफएमके पहुँच आउर विस्तार होसकले हुनकर सुझाव हए । चौधरी विभिन्न रेडियोसे सम्मान मिलल आ कार्यक्रम सञ्चालन करेके अवसर मिलल अनुभव समेत सुनएलन । कुछ दिन पहिले नएका खुलल धड्कन एफएम आयोजना कएल कार्यक्रममे सहभागी होके अपन विजेता बनल आ एक घण्टाके कार्यक्रम सञ्चालन करेके अवसर मिलल बतएलन । सीमाक्षेत्रके दोसर एफएमके कार्यक्रम आ वार्षिक कार्यक्रममे समेत सहभागी होईत आएल जानकारी देलन ।

बज्जिकाञ्चल एफएमके भविष्यके बारेमे धारणा रखईत चौधरी श्रोता आ रेडियोकर्मीबीच पारिवारिक आ आत्मीय सम्बन्ध कायम रखके कार्यक्रम सञ्चालन करेके सुझाव देलन। श्रोता आ प्रस्तोताबीच सकारात्मक सम्बन्ध रहलासे रेडियो कार्यक्रम आउर प्रभावकारी बनाबेके हुनकर कहनाम हए ।‘र्‍यापिड फायर’मे चौधरी बिहानसे राततक समयअनुसार विभिन्न रेडियोके कार्यक्रम सुनईत आएल बतएलन । समाचार, भक्ति संगीत, मनोरञ्जन आ पुरान हिन्दी गीतके कार्यक्रम हुनकर मनपसन्द रहल हए । रेडियो सुनेके माध्यमके बारेमे पूछला पर हुन पहिले रेडियो सेट प्रमुख माध्यम रहल, बाकिर अभि मोबाइल आ अनलाइनसे रेडियो सुनेके सुविधा आउर सहज भेल बतएलन ।

अपन मोबाइलसे समेत एफएम ट्युन करके बज्जिकाञ्चल एफएम सुनेके हुन बतएलन । कार्यक्रममे चौधरीसे बातचित चलईत समय मोहम्मदपुर निवासी सुरेन्द्र रस्तोगी फोनमार्फत सहभागी होएके लमहर समयके बाद रेडियोमार्फत चौधरीसे जोडिन मिललापर खुसी लागल बतएलन । हुन चौधरीके लमहर रेडियो यात्राके स्मरण करईत बज्जिकाञ्चल एफएमके कार्यक्रमप्रति समेत खुसी व्यक्त कएलन । बज्जिकाञ्चल एफएम ८९.२ मेगाहर्ज श्रोता सबके प्रत्यक्ष सहभागी करावईत ‘क्यूरी स्वाद संवाद’ कार्यक्रम समेत सञ्चालन करईत आएल हए । क्यूरी मसालाके प्रायोजनमे सञ्चालन होए वाला एह कार्यक्रममे ज्ञानवर्धक आ सामान्य जानकारीसे सम्बन्धित प्रश्न पूछल जाइअ आ सही उत्तर देवे वाला विजेताके आकर्षक पुरस्कार प्रदान कएल जाईअ ।