सागर संगम ठाकुर, रौतहट, कार्तिक १९ गते ।

रौतहटके नर्सरी व्यवसाय के आधुनिक प्रविधि, गुणस्तरीय बिरुवा उत्पादन आ प्रभावकारी बजार व्यवस्थापनके माध्यम से राष्ट्रिय पहचान देवेके चाहीं, युवा नर्सरी व्यवसायी तथा कृषि अभियन्ता रितेश कुमार साह जोर देले हए।

बज्जिकाञ्चल एफएम ८९।२ मेगाहर्जके नियमित कार्यक्रम ‘बज्जिकाञ्चल बहस’ में बातचीत करत कटहरिया नगरपालिका–३ निवासी साह कृषि क्षेत्रके सम्भावना के व्यावसायिक अवसरके रूप में उपयोग करे खातिर किसान, कृषि विद्यार्थी आ युवासभ से आग्रह कएले।

किसान परिवार में जन्मल साह फत्तेपुरस्थित जनपदीय प्राविधिक शिक्षालय से १८ महिनेके जेटीए कोर्स पूरा कएले हए। पढ़ाई के दौरान नेपाल प्रथम स्थान हासिल कला के बाद ऊ कृषि क्षेत्र में रहल परम्परागत अभ्यास आ प्राविधिक कमजोरी के सुधार करेके उद्देश्य से नर्सरी व्यवसाय शुरू कएला के बतवले।

उनकर कहनाम हए कि गाँव में अनुराग दास बाबा भारतके बिहार से नर्सरी सम्बन्धी सीप ले अइला के बाद स्थानीय स्तर पर बिरुवा उत्पादनके अभ्यास शुरू भेल। फलफूल, फूल, सजावटी, जड़ीबुटी आ काठजन्य बिरुवाके उत्पादन गाँवके पहचान आ रोजगारके आधार बनल हए।

साहके अनुसार बीज, कटिङ, एयर लेयरिङ, ग्राफ्टिङ, बडिङ आ टिस्यु कल्चर प्रविधि से बिरुवा उत्पादन कएल जा रहल हए। आम आ लीची जइसन फलफूल में जातीय शुद्धता कायम रखे लेल स्वस्थ मातृबोट से ग्राफ्टिङ आ एयर लेयरिङ करेके चाहीं।

व्यावसायिक खेती शुरू करे से पहिले माटी, हावापानी, सिंचाइ आ बजारके सम्भाव्यता अध्ययन करके उपयुक्त जातके बिरुवा चुनेके सुझाव ऊ देले हए। सामाजिक सञ्जाल बजार विस्तार में सहयोगी बनल उल्लेख करत साह गुणस्तर आ ग्राहकके विश्वास के व्यवसायके मुख्य आधार रहल बतवले हए।

रौतहट के नर्सरी उत्पादनके विशेष क्षेत्रके रूप में राष्ट्रिय पहचान देवे लेल स्थानीय, प्रदेश आ संघीय सरकार से तालिम, अनुदान, प्राविधिक सहयोग आ बजार व्यवस्थापन में प्राथमिकता देवेके मांग कएले हए ।

कृषि विद्यार्थीसभ के अपना नर्सरी में व्यावहारिक अभ्यासके अवसर उपलब्ध करावे लेल तैयार रहल बतावइत साह किसानसभ से बिरुवा खरीदेके समय ओकर जात आ गुणस्तर जाँच करके खाली विश्वासयोग्य नर्सरी से ही बिरुवा खरीदेके आग्रह कएले।