बज्जिकाञ्चल एफएम संवाददाता, कार्तिक १८ गते।

नेपाली कम्युनिष्ट पार्टी गरुडा नगर कमिटीके आयोजन में शुभ दीपावली आ छठ पर्वके अवसर पर नगरस्तरीय शुभकामना आदान(प्रदान आ भेटघाट कार्यक्रम भव्य रूप से सम्पन्न भेल हए।

रौतहटके गरुडा नगरपालिका स्थित मेथुर चौधरी धर्मशाला में आयोजित कार्यक्रम में पार्टीके नेता, कार्यकर्ता, स्थानीय अगुवा आ आम नागरिक सबके उल्लेखनीय सहभागिता रहल रहे।

कार्यक्रमके विशेष अवसर पर विभिन्न राजनीतिक दल छोड़के सैकड़न नेता आ कार्यकर्ता नेपाली कम्युनिष्ट पार्टी में प्रवेश कएले बाड़न।

नया प्रवेश करेवाला नेता आ कार्यकर्ता सबके कार्यक्रमके प्रमुख अतिथि नेपाली कम्युनिष्ट पार्टीके नेता रामकुमार भट्टराई आ गरुडा नगरपालिकाके मेयर प्रत्यासी बृजकिशोर प्रसाद यादव अबिर आ माला लगाके स्वागत कएलन। ओइसाही नवप्रवेशी सबके पार्टी में हार्दिक बधाई आ शुभकामना देलन।

दीपावली आ छठ पर्वके अवसर पर आयोजित शुभकामना आदान(प्रदान कार्यक्रम के साथे बड़का संख्या में नेता आ कार्यकर्ता सबके पार्टी प्रवेश से गरुडा में नेपाली कम्युनिष्ट पार्टी के प्रति राजनीतिक आकर्षण बढ़ रहल सन्देश मिलल हए।

कार्यक्रम में सहभागी नेता सब दीपावली आ छठ पर्वके शुभकामना आदान(प्रदान करत आपसी सद्भाव, एकता, सामाजिक सहिष्णुता आ भाईचारा के आउरी मजबूत बनावे पर जोर देलन।

कार्यक्रम हर्षोल्लास आ उत्साहपूर्ण माहौल में सम्पन्न भेल।