बज्जिकाञ्चल  संवाददाता्,कार्तिक १६ गते।

रौतहटमे भारत से अवैध रूपसे तस्करी करके नेपाल ल्यावल गेल ११०० गो मुर्गिके बच्चा पुलिस बरामद करके नष्ट कएले हए।

बौधिमाई नगरपालिका–९ पानीटंकी स्थित अरुवा खोलासे सोमारके दिन भोरे पुलिस उ बच्चा सभके नियन्त्रणमे लेले रहे। भारतके घोड़ासहन से बारा–रौतहट सीमावर्ती इलाका होत अरुवा खोलाके बाटे लुकाछिपाके नेपाल भितर घुसावल गेल उ बच्चासभके अनुमानित मूल्य १ लाख २५ हजार रुपइया रहल पुलिस जनवले हए।

बरामद कएल गेल बच्चासभके प्रहरी चौकी बंकुलमे ले जाके स्थानीय भद्रभलादमीके रोहबरमे नष्ट कएल गेल। प्रहरी चौकी बंकुलके प्रमुख प्रहरी सहायक निरीक्षक रमेश यादव ई जानकारी देले बाड़न।

भारत से अवैध रूपसे कुखुराके चिचिया नेपाल भितर घुसावल से स्थानीय कुखुरापालन व्यवसाय प्रभावित होखेके खतरा रहल हए। एकरा अलावा बाहर इलाका से ल्यावल गेल बच्चासभके माध्यम से पशुपन्छीमे अलग(अलग किसिमके रोग फइलेके जोखिम भी रहल रहे।

एह चलते सीमा क्षेत्रमे पुलिस निगरानी आउर कड़ा बनावे आ अवैध रूपसे कुखुराके बच्चा भितर घुसावेवाला गतिविधि पर नियन्त्रण करेके जरूरी देखल गेल हए।