रामअधार यादब, रौतहट, १४ गते कार्तिक ।

रौतहटके कटहरियामे मधेस रेडियो श्रोता संघके आयोजनमे भव्य रक्तदान कार्यक्रम सम्पन्न भेल हए। मानव सेवा आ परोपकारके उद्देश्य से आयोजित एह कार्यक्रममे २० गो लोग उत्साहके साथ रक्तदान कएले हए।

संघके अध्यक्ष रामबाबु साहके अध्यक्षतामे आयोजित कार्यक्रममे विभिन्न राजनीतिक दलके प्रतिनिधि, जनप्रतिनिधि, सुरक्षाकर्मी, समाजसेवी आ स्थानीय बुद्धिजीवी सबके उल्लेखनीय उपस्थिति रहल रहे ।

कार्यक्रममे कटहरिया नगरपालिकाके मेयर पदके प्रत्याशी आ नेकपा के कटहरिया नगर अध्यक्ष नसरुदिन अन्सारी, कटहरिया नगरपालिका वार्ड नम्बर ५ के अध्यक्ष सरफलाल गुप्ता, वार्ड नम्बर ४ के अध्यक्ष चन्दन कुशवाहा, निर्माण व्यवसायी आ भावी मेयर पदके उम्मेदवार श्रीकान्त यादव तथा मेयर पदके प्रत्याशी योगेन्द्र शाह सहभागी रहल रहें।

ओइसहीे इलाका प्रहरी कार्यालय कटहरियाके प्रमुख जयप्रकाश शाह, राष्ट्रिय स्वतन्त्र पार्टी कटहरियाके नगर अध्यक्ष भिखारी पण्डित आ नेपाल रेडक्रस सोसाइटी रौतहटके मन्त्री धर्मेन्द्र प्रसाद सिंह लगायतके विशिष्ट व्यक्तित्व सबके उपस्थिति रहल रहे ।

कार्यक्रमके सफल बनावेके लेल मेयर पदके प्रत्याशी नसरुदिन अन्सारी, वार्ड अध्यक्ष सरफलाल गुप्ता, भावी मेयर उम्मेदवार श्रीकान्त यादव आ वार्ड अध्यक्ष चन्दन कुशवाहा विशेष सहयोग कएले रहलन । कार्यक्रममे बोलत उहाँ सब रक्तदानके जीवनदानके संज्ञा देत अइसन सामाजिक आ परोपकारी काममे राजनीतिक दल, जनप्रतिनिधि आ स्थानीय बासिन्दा सबके एकजुट होखेके जरूरत पर जोर देलन ।

मधेस रेडियो श्रोता संघके एह सराहनीय पहलके प्रशंसा करइत उहाँ सब आगे भी अइसन सामाजिक काममे पूरा सहयोग करेके प्रतिबद्धता जनएले हए ।

ओही अवसर पर नेपाल रेडक्रस सोसाइटी रौतहटके मन्त्री धर्मेन्द्र प्रसाद सिंह समाजमे खूनके कमीके चलते आजो बहुत लोगके जान जाएके खतरा रहल बतवले हए । उहाँ युवा लोगसे नियमित रूपसे रक्तदान करेके अपील कएले हए । रेडक्रस आ ब्लड बैंकके ओरसे जरूरी प्राविधिक सहयोग लगातार उपलब्ध करावेके भरोसा देत उहाँ जीवन बचावेवाला अइसन अभियान चलावे खातिर आयोजक संस्थाके धन्यवाद देलें।

कार्यक्रममे माध्यमिक विद्यालय भषेढवाके प्रधानाध्यापक कपिलदेव प्रसाद यादव, कटहरियाके चार्टर्ड एकाउन्टेन्ट (सीए) सन्तोष सोनी, बाल कल्याण विद्या मन्दिरके प्रबन्ध निर्देशक बैजु दास कथवनिया आ जीवन ज्योति हस्पिटलके सञ्चालक पवन ठाकुर लगायत स्थानीय व्यवसायी आ बुद्धिजीवी सबके सक्रिय सहभागिता रहल।

एह रक्तदान कार्यक्रमके प्रचार–प्रसार आ मिडिया पार्टनरके रूपमे बज्जिकाञ्चल एफएम ९२.२ मेगाहर्ज, नेपाल परिवेश डटकम, कोल्हवी न्यूज आ बौधीमाई खबर डटकम रहलें।

कार्यक्रमके सफल बनावे मे वरिष्ठ पत्रकार संजय मिश्र, प्रकाश श्रेष्ठ, बज्जिकाञ्चल एफएमके सञ्चालक आ पत्रकार आरके श्रीवास्तव, एफएमके स्टेशन म्यानेजर आ पत्रकार सागर संगम ठाकुर, सम्पादक रामधार प्रसाद यादव, एफएमके प्रस्तोता सुरज यादव आ प्राविधिक चन्दन यादव लगायतके टीम महत्वपूर्ण योगदान देलक।

कार्यक्रममे सहयोग करेवाला अतिथि आ विशिष्ट व्यक्तित्व सबके प्रशंसापत्र आ गमछा ओढ़ाके सम्मानित कइल गइल। ओही तरे रक्तदान करेवाला रक्तदाता सबके नेपाल रेडक्रस सोसाइटी आ आयोजक संस्थाके ओरसे प्रशंसापत्र आ प्रमाणपत्र देके सम्मानित कइल गइल।

नेपाल रेडक्रस सोसाइटीके मन्त्री धर्मेन्द्र प्रसाद सिंहके नेतृत्वमे आइल रेडक्रस टोलीके प्राविधिक सहयोगसे रक्तदान कार्यक्रम सम्पन्न भइल। युवा लोगके उत्साहजनक सहभागिता रहल एह कार्यक्रमसे समाजमे रक्तदान प्रति जागरूकता बढ़ावे मे मदद मिलल, आयोजक संस्था जनकारी देले हए।

कार्यक्रमके सफल बनावे मे मधेस रेडियो श्रोता संघके उपाध्यक्ष सुमित्रा देवी सोनार, सचिव रामसेवक ठाकुर, कोषाध्यक्ष गोबिन्द ठाकुर, संस्थापक वीरेन्द्र ठाकुर आ सदस्य सब सुरज साह, पुनित ठाकुर, राजाराम साह, शंकर पटेल, रामध्यान साह आ सागर चौधरी लगायतके महत्वपूर्ण सहयोग रहल रहे ।

कार्यक्रमके अन्तमे मधेस रेडियो श्रोता संघके अध्यक्ष रामबाबु साह रक्तदान कार्यक्रम सफल बनावे आ सहयोग करेवाला सम्पूर्ण अतिथि, रक्तदाता आ सहयोगी सबके धन्यवाद देलें हए।