E-bajjikanchal Desk
रामअधार यादव, रौतहट, कार्तिक १ गते।
रौतहट जिल्ला के कटहरिया नगरपालिका–१ आ २ के छेदीचौक में श्री नौ दुर्गा पूजा समिति के आयोजन में दू दिनके कुश्ती प्रतियोगिता (दंगल) आज से शुरू होएल हए ।
मेला आयोजक समिति के अनुसार ई प्रतियोगिता आजु आ विहान होएबाला हए ।
कुश्ती प्रतियोगिता शुरू होखे से पहिले मेला समिति खेल होखे वाला जगह पर विधि-विधान से पूजा-पाठ कएल गेल रहे ।
ओकरा बाद हनुमानजी के ध्वजा पर झंडा लगाके धार्मिक विधि के अनुसार दंगल के शुभारम्भ कएलन ।
एह अवसर पर रौतहट निर्वाचन क्षेत्र नम्बर ३ के माननीय सांसद रविन्द्र पटेल उर्फ धिरज के सम्मान कएले हए ।
कार्यक्रम में भावी नगरप्रमुख पद के उम्मेदवार श्रीकान्त यादव, वडा अध्यक्ष भूपेन्द्र महतो कोइरी, समाजसेवी प्रेमशंकर यादव, वडा अध्यक्ष हरिन्द्र साह, पूर्व वडा अध्यक्ष राजकुमार साह, विजय यादव, नगर उपप्रमुख पद के प्रत्याशी जितेन्द्र यादव, नगर सभापति भिखारी पण्डित, युवा नेता राजु भास्कर समेत स्थानीय जनप्रतिनिधि, राजनीतिकर्मी, समाजसेवी आ हजारों खेलप्रेमी लोग के उपस्थिति रहल रहे ।
दंगल के पहिल चरण में भावी नगरप्रमुख पद के उम्मेदवार श्रीकान्त यादव पहलवानसभ से हाथ मिलाके आ एक-एक हजार रुपैयाँ नगद देके खेल के शुरुआत करवलन ।
दोसरा चरण में नगर सभापति भिखारी पण्डित पहलवानसभ से हाथ मिलाके प्रतियोगिता के आगे बढ़वलन।
ओही तरह तेसरा चरण में नेपाल के प्रसिद्ध पहलवान देवा थापा समेत अन्य पहलवानसभ के बीच मुकाबला भइल। एह चरण में सांसद रविन्द्र पटेल उर्फ धिरज दुनू पहलवान के हाथ मिलाके कुश्ती के शुरुआत करवलन।
ऊ दुनू पहलवान के एक-एक हजार रुपइया नगद पुरस्कार देलन आ बढ़िया खेल देखावे के लेल शुभकामना भी देलन ।
मेला आयोजक समिति के अनुसार, आजु आ विहान चले वाला एह प्रतियोगिता में अलग-अलग जगह से आएल महिला आ पुरुष पहलवानसभ अपन दाँव-पेंच के प्रदर्शन करेवाला हए ।
परम्परागत कुश्ती खेल के संरक्षण, पहलवानसभ के प्रतिभा देखावे के अवसर देवे आ स्थानीय धार्मिक तथा सांस्कृतिक परम्परा के कायम रखे के उद्देश्य से ई प्रतियोगिता आयोजित कएल गेल हए ।
छेदीचौक में आयोजित श्री नौ दुर्गा पूजा मेला के ई दंगल स्थानीय लोग आ खेलप्रेमीसभ के मनोरंजन करे के साथे परम्परागत खेलकूद के प्रति आकर्षण बढ़ावे में मददगार होखे के अपेक्षा कएल गेल हए ।
