सागर संगम ठाकुर, रौतहट, असोज ३० गते।

रौतहटके देवाही गोनाही नगरपालिका–९ धरहरी के वडाध्यक्ष पदके आकांक्षी सुमित गुप्ता शिक्षा, स्वास्थ्य, कृषि आ पूर्वाधार विकास के प्राथमिकता देके काम करेके प्रतिबद्धता जनएले हए । बज्जिकाञ्चल एफएमके ‘बज्जिकाञ्चल बहस’ कार्यक्रममे प्रस्तोता सागर संगम ठाकुर से बातचीत करईत गुप्ता वडावासी से योग्य आ शिक्षित उम्मीदवार चुनेके आग्रह कएलन । गुप्ता कहलन कि धरहरी मे कई गो शिक्षण संस्था रहला के बावजूद शिक्षित युवा रोजगार के खोज मे विदेश जाए पर मजबूर हए ।

शिक्षा के सीप, रोजगार आ उत्पादन से जोड़ेके जरूरत हए । गरीब आ विपन्न परिवार के विद्यार्थी लेल छात्रवृत्ति आ आर्थिक सहयोग के व्यवस्था करेके भी हुनकर योजना हए । ऊ धरहरी मे बनल बर्थिङ सेन्टर चालू करावे, विद्यालय आ सार्वजनिक सम्पत्ति के संरक्षण करेके आ रामजानकी मठ के अधूरा निर्माण पूरा करावेके लेल पहल करेके प्रतिबद्धता जनएलन ।

कृषि के विकास लेल बरिसन से बन्द पड़ल डीप बोरिङ चालू करावल, कृषि सड़क बनावल आ पानी निकास के व्यवस्था करेके काम के ऊ प्राथमिकता देले हए । सिंचाई सुविधा बढ़ला से किसान के लागत घटे आ उत्पादन बढ़े, एह दिशा मे काम करेके हुनकर कहनाम हए । गुप्ता अपना परिवार के शिक्षा, राजनीति आ समाजसेवा से जुड़ल पृष्ठभूमि के चर्चा करईत कहलन कि ओही प्रेरणा से ऊ राजनीति मे आएल हए ।

२०७९ सालके स्थानीय चुनावमे ऊ वडाध्यक्ष पदके उम्मीदवार बनल रहलन । बाद मे ऊ राष्ट्रिय स्वतन्त्र पार्टी ९रास्वपा० से जुड़ गेलन । हुनकर आरोप हए कि विगत के नेतृत्व मे पारदर्शिता आ जिम्मेवारी के कमी के चलते जनता के अपेक्षा के अनुसार विकास ना हो सकल। ऊ विकास के काम मे पारदर्शिता, जवाबदेही आ जनहित के प्राथमिकता देवे पर जोर देलन ।