चाडबाडके समय रौतहटमे बडका पैमाना पर तस्करी दशहरा, तिहार आ छठ पाबनि नजदीक आविते रौतहटमे तस्करीके धन्धा तेजी से बढ रहल हए । मुख्य आ सहायक नाका से दू दर्जन से बेसी संगठित तस्कर रौतहटमे अवैध कारोबार शुरू क देले हए । सीमापर तैनात सशस्त्र प्रहरी आ नेपाल प्रहरीके सहयोग से रौतहटके मुख्य नाका गौर सहित ग्रामीण नाकासभ से पोका ढोवेवाला आ संगठित तस्कर अवैध कारोबार तेज क देले हए ।

घरके काम खातिर सामान ले आवेवाला स्थानीय लोग पर कडाई करके परेशानी दिहल जा रहल हए, जबकि तस्कर बिना रोकटोक कारोबार करईत हए । एह बात से स्थानीय लोग आक्रोशित हए । गौरके मुख्य नाका से तस्करी करके लावल सामान भन्सार रोड पर रहल अलग–अलग घरसभ मे जमा कएल जा रहल हए । ओहिजा से सामान जिला के दोसरा इलाकासभ मे भेजल जाला । कुछ नाकासभ पर बरखा के पानी से रास्ता बन्द भेला के बाद सशस्त्र प्रहरी गौरके मुख्य नाका से गरुडा आ चन्द्रनिगाहपुर तक तस्करी करेके रास्ता देले हए, अइसन आरोप लगावल गेल हए ।

एही तरह राजदेवी नगरपालिका से सटल भारतके सीमावर्ती इलाका मे भी तस्कर गोदाम बनाके कारोबार करईत हए । चाडबाड नजदीक आवे आ व्यापारी लोग सामान जमा करेके लागला के बाद रौतहटके दक्षिणी सीमावर्ती इलाकासभ से चोर रास्ता के इस्तेमाल करके अलग–अलग सामान के तस्करी हो रहल हए । स्थानीय बासिन्दासभ के कहनाम बा कि गौरके मुख्य नाका के अलावा ब्रह्मपुरी, लक्ष्मीपुर बेलबिछवा, महादेवपट्टी, बन्जरहा, औरैयाके मनमोहनद्वार, रामपुर खाप, नरकटिया, बंकुल आ सीमावर्ती बारा के कचोर्वा रास्ता से भी हए पैमाना पर सामान के तस्करी हो रहल हए ।