सागर संगम ठाकुर, रौतहट, कार्तिक १८ गते।

रौतहटके गरुडा नगरपालिकाके मेयर पदके प्रत्यासी आ जनता समाजवादी पार्टी जसपा नेपालके मधेश प्रदेश कमिटी सदस्य अनिल यादव आगामी स्थानीय तहके निर्वाचन में नगर प्रमुख पद पर अपना दाबेदारी पेश कएले हए । हुन अग्रगामी मोर्चाके समर्थन से चुनाव जीतेके दाबी कएले हए ।

अपना पिछला विकास निर्माणके अनुभव, नगरवासी सबके साथ निरन्तर सम्बन्ध आ विभिन्न मधेशवादी दल सबके बीच राजनीतिक एकता के अपना जीतके मुख्य आधार बतएले हए ।

बज्जिकाञ्चल एफएम ८९.२ मेगाहर्जके ‘बज्जिकाञ्चल बहस’ कार्यक्रम में प्रस्तोता आरके श्रीवास्तव से बातचीत करईत यादव कहलन कि हुन लम्बा समय से नगरवासी सबके सुख दुःख में सहभागी होईत आएल छत ।

जनता के समस्या समाधान करेके लेल लगातार समय देईत आएल छत आ ईहे सम्बन्ध आगामी चुनाव में अपना ताकत बनी । हुन अपना पिता आ गरुडा नगरपालिकाके पूर्व नगर प्रमुख इनु राय यादवके कार्यकाल में विकास निर्माणके विभिन्न काम में सहयोगी भूमिका निभावेके बात याद कएलन ।

उ समय नगरपालिका के अलग अलग वार्ड में सड़क, ढलान आ अन्य पूर्वाधार निर्माणके काम भेल रहे । बाकी रहल अधूरा योजना सबके पूरा करेके लेल फेर से राजनीतिक मैदान में उतरल हए हुन बतएलन । पिताके स्वास्थ्य अवस्था कमजोर भेला के बाद स्थानीय लोग अपना के राजनीति में सक्रिय होएके आग्रह कएले रहे । आ जनताके इच्छा अनुसार उम्मेदवारी देवेके निर्णय लेहनी, यादव कहलन । ३ हजार ३ सय ५१ मत के कमजोर जनमत मानेके न हए ।

२०७९ सालके स्थानीय तह निर्वाचन में अपना के ३ हजार ३ सय ५१ मत मिलला के चर्चा करईत यादव कहलन कि ई मत के कमजोर जनमत मानल ठीक न हए । जसपा नेपाल से टिकट मिलला के बाद पार्टीके दोसरा नेता बृजकिशोर यादव अन्तिम समय में पार्टी छोड़के दोसरा दल से उम्मेदवारी देला के चलते मत बँटवारा भेल रहे, यादवके दाबी हए । चुनाव में पराजित भेला के बादो नगरवासी सबके साथ सम्बन्ध आ राजनीतिक सक्रियता जारी रखले, हुन बतएलन ।

पिछला साढ़े चार से पाँच साल तक नगरपालिका के अलग अलग गाँव आ टोल में पहुँचके नागरिक सबके सुख दुःख में सहभागी होईत व्यक्तिगत आ सामुदायिक समस्या समाधान में सहयोग करईत आएल छत यादव कहलन ।

 

अग्रगामी मोर्चा से उम्मेदवारी देवेके तैयारी यादव आगामी निर्वाचन में विभिन्न मधेशवादी राजनीतिक दल सबके सहभागिता में बनल अग्रगामी मोर्चा से गरुडा नगरपालिकाके मेयर पद पर उम्मेदवारी देवेके तैयारी में छत । मोर्चा में शामिल दल सबके एकता से स्थानीय राजनीतिक समीकरण पर असर पड़ेके हुनकर विश्वास हए ।

खास करके आम जनता पार्टीके अध्यक्ष प्रभु साहके गरुडा क्षेत्र में रहल राजनीतिक प्रभाव से मोर्चा आ मजबूत होई, हुन बतएलन । प्रभु साहके प्रभाव से मोर्चाके पक्ष में आ दू से तीन हजार मत बढ़ सकईअ यादवके आकलन हए ।

 

गरुडा बजारके बीच में अग्रगामी मोर्चाके सम्पर्क कार्यालय स्थापना कएल गेल हए । ई कार्यालय में रोजाना ५० से ६० गो स्थानीय लोग से भेंटघाट आ विचार विमर्श होईत रहल यादव जानकारी देलन ।

कार्यालय से विभिन्न राजनीतिक दलके नेता आ कार्यकर्ता बीच समन्वय बढ़ावे के साथे आगामी चुनावके गतिविधि सञ्चालन करेमें सहयोग मिल रहल हुनकर कहनाम हए । मधेशी दल सबके बीच एकता जरूरी अग्रगामी मोर्चा बनला के बाद पहिले एक दोसराके राजनीतिक प्रतिस्पर्धी रहल दल सबके नेता आ कार्यकर्ता बीच सहकार्यके वातावरण बनल यादव बतएलन ।

मधेशके राजनीतिक मुद्दा सबके साझा रूप से उठावे आ जनता के समस्या समाधान करेके लेल दलगत प्रतिस्पर्धा से ऊपर उठके काम करेके उद्देश्य से मोर्चा गठन भेल हुनकर कहनाम हए । गरुडा में आयोजित मोर्चाके कार्यक्रम में विभिन्न दलके नेता आ कार्यकर्ता सबके सहभागिता से स्थानीय स्तर पर एकताके सकारात्मक सन्देश गेल हुन बतएलन । कुछ लोग में असन्तुष्टि देखेके मिललक बादमे नेता सबके बीच अइसन समस्या न हए ।

आगामी चुनाव में मोर्चाके साझा उम्मेदवार के जितावेके लेल सब एकजुट रही, यादव दाबी कएलन । टिकट मिलेके यादव के विश्वास रेडियो बहस कार्यक्रम में सहभागी एक स्थानीय श्रोता मोर्चा में आठ गो दल शामिल भेला के बाद उम्मेदवार चयन, जनताके सहभागिता आ स्थानीय राजनीतिक समीकरण के बारेमें सवाल उठएले रहलन । जवाब में यादव कहलन कि जसपा नेपालके तरफ से हुन गरुडा नगरपालिकाके मेयर पदके स्वाभाविक दाबेदार रहल हए ।

मोर्चा में शामिल दोसरा दल सबके तरफ से फिलहाल अपना तुलना में मजबूत दाबेदार न हए । मोर्चा में शामिल सब दल से सहयोग मिलेके विश्वास हुन व्यक्त कएलन । हुनकर कहनाम अनुसार, मोर्चा गठन होएसे पहिले ही करीब ८० प्रतिशत समर्थक हुनकर साथ जुड़ चुकल रहलन । लम्बा समय से नगरवासी सबके सम्पर्क में रहके काम कएला से अपना पक्ष में जनसमर्थन बढ़ल हए, यादव बतएलन ।

शिक्षा आ अधूरा विकास योजना प्राथमिकतामें यादव आगामी कार्यकाल में गरुडा नगरपालिकाके विकास निर्माण के साथे शिक्षा क्षेत्र के विशेष प्राथमिकता देवेके बात कहलन ।पहिले निर्माण शुरू भेला के बावजूद समयके अभाव में पूरा न हो सकल सड़क आ अन्य पूर्वाधार योजना सबके पूरा करेके उनकर प्रतिबद्धता हए ।

ओइसहीं गरुडा क्षेत्रके सामुदायिक विद्यालय सबके शैक्षिक गुणस्तर सुधारके निजी आ बोर्डिङ विद्यालय से बेहतर शिक्षा सरकारी विद्यालय में ही उपलब्ध करावेके वातावरण बनावल अपना लक्ष्य बतएलन । पिछला विकास निर्माणके अनुभव, नगरवासी सबके साथ निरन्तर सम्बन्ध, अधूरा योजना पूरा करेके प्रतिबद्धता आ अग्रगामी मोर्चाके राजनीतिक एकता के आधार बनाके आगामी निर्वाचन में प्रतिस्पर्धा करेके लेल तैयार रहल यादव बतएले छत ।