रामअधार यादव, रौतहट, कार्तिक २ गते।

रौतहट जिल्लाके कटहरिया नगरपालिका–१ आ २ के बीच छेदीचोकमे लागल श्री नौ दुर्गा पूजा मेलाके मेयर प्रत्यासी नसरुद्दिन अन्सारी १२ हजार रुपैया नगद सहयोग कइले बानी।

उहाँके सहयोगके सराहना करईत मेला आयोजक समितिके पदाधिकारीसब गम्छा ओढ़ाके सम्मान आ स्वागत कएले हए ।

हिन्दू धर्मावलम्बी सबके धार्मिक आस्था, परम्परा आ सांस्कृतिक पर्वके सम्मान करईत आएल अन्सारी एहसे पहिले भी उक्त मेलाके ११ हजार रुपैया सहयोग कएले रहलन ।

एह साल फेरु आर्थिक सहयोग करके उहाँ धार्मिक आ सांस्कृतिक गतिविधिमे लगातार साथ देवेके भावना देखलगेल हए ।

सम्मान आ स्वागत कार्यक्रममे वडा अध्यक्ष भुपेन्द्र महतो आ हरिन्द्र साह, वडा अध्यक्ष श्यामाकानत यादव, पूर्व वडा अध्यक्ष राजकुमार साह, समाजसेवी तथा नेकपाके जिल्ला सदस्य प्रेमशंकर यादव सहित मेला आयोजक समितिके पदाधिकारी आ सदस्यसबके उपस्थिति रहल रहे ।

छेदीचौकमे लागेवाला श्री नौ दुर्गा पूजा मेला स्थानीय लोगके धार्मिक आस्था आ सांस्कृतिक परम्परासे जुड़ल एगो महत्वपूर्ण पर्वके रूपमे हए ।

मेला व्यवस्थापन आ धार्मिक कार्यक्रम संचालन लेल मिलल एह आर्थिक सहयोगसे आयोजक समितिके काममे मदद मिलेके अपेक्षा कएल गेल हए।

धार्मिक आस्था आ सांस्कृतिक परम्पराके सम्मान करईत नसरुद्दिन अन्सारीके ई निरन्तर सहयोग सामाजिक सद्भाव आ आपसी भाइचाराके एगो उदाहरण बनल हए ।