आरके श्रीवास्तव,रौतहट,१३ गते वैशाख ।

रौतहटसे बज्जिका साहित्यमे एगो नयाँ कृति थपाएल हए । बज्जिका भाषा आ साहित्यके क्षेत्रमे माधव नारायण नगरपालिका ६ माधोपुुर निवासी सेवा निवृत्त शिक्षक पृथ्वीनारायण महतो पहिल बज्जिका कृति पृथ्वी ज्ञान गंगा प्रकाशित भेल हए ।

कवि महतोके नयाँ कृतिके एक समारोहबीच माधोपुरस्थित माध्यमिक विद्यालयमे लोकार्पण कएलगेल हए । प्रमुख अतिथि माधव नारायण नगरपालिकाके नगर प्रमुख बैजुनाथ प्रसाद यादव, माधोपुरके माध्यमिक विद्यालयके प्रधान शिक्षक राम सिंहासन प्रसाद यादव आ कवि महतोसहितके लोग सामूहिक लोकार्पण कएले छत ।

लोकार्पित कृतिके साथे बज्जिका भाषा आ साहित्यके इतिहासपर साहित्यकार संजय साह मित्र प्रकाश पारलन । कार्यक्रममे प्रमुख अतिथि नगर प्रमुख यादव अपन भाषा, संस्कृति आ पहचानके खोजी करनाइ जरुरी रहल बतबइत पालिकामे मातृभाषा शिक्षँ लागू करेके विचार कररहल बतएले छत । बज्जिका भाषा विकास परिषद नेपालके अध्यक्ष तथा अनिता शिव प्रतिष्ठानके संरक्षक शिवचन्द्र साह नगरपालिकासे मातृभाषा बज्जिकाके लागू करेला आग्रह कएले छत ।

अइसही साहित्यकार बिन्दा साहनी बज्जिकाके सम्बन्ध प्राचीन बज्जी संघसे रहल उलेख करइत वर्तमानमे बज्जिका भाषा आ साहित्यके विकास सन्तोषजनक होरहल बतएलन । अइसही पूर्व शिक्षक नागेन्द्र प्रसाद साह बज्जिकाके बुद्धके समयसे जोडइत कमसे कम पचीस सय बरस पुरान इतिहास रहल बतएलन । कार्यक्रममे बज्जिका साहित्य समाज सर्लाहीके अध्यक्ष रामचन्द्र महतो कुशवाहा बज्जिका भाषाके साहित्यके इतिहासमे नयाँ कृति आ नयाँ कृतिकारके स्वागत करइत आगामी दिनमे बज्जिकाके विकास आउर निमनसे होएके विश्वास व्यक्त कएले छत ।

कार्यक्रममे बज्जिका साहित्य संगम रौतहटके उपाध्यक्ष रेणु गुप्ता, बज्जिका साहित्य समाज सर्लाहीके उपाध्यक्ष शैलियादेवी ठाकुर, कोषाध्यक्ष चन्द्रशेखर प्रसाद रस्तोगी, विपिन बिहारी सिंह, मनमोहनसिंह मनोहर, अमरिश भगत, तुलसी प्रसाद महतो लगायतके लोग रचना आ मन्तव्य व्यक्त करइत बज्जिकाके अगाडि बढाबेला सलाह देले छत ।

कृतिकार पृथ्वीनारायण महतोद्वारा स्वागत, बज्जिका साहित्य संगम रौतहटके अध्यक्ष किशुनदयाल श्रीकृष्णद्वारा संचालित कार्यक्रममे बज्जिकाञ्चल मिडिया प्रालिके प्रमुख राजुकुमार श्रीवास्तव, पत्रकार सागर संगम ठाकुरसहित दू दर्जनसे बेसी बज्जिकासेवी तथा शुभचिन्तक लोगके सहभागिता रहल रहे ।