रौतहट, २८ साउन ।

रौतहट जिल्लाके सरकारी कार्यालयसबके लेखापरीक्षण कार्य महालेखा परीक्षकके कार्यालय औपचारिक रूपमे सुरु कएले हए । मंगरके जिल्ला समन्वय समिति रौतहटके सभाकक्षमे आयोजित कार्यक्रममार्फत लेखापरीक्षण कार्यके सुरु कएलगेल हए ।

महालेखा परीक्षक कार्यालयके निर्देशक सुनिलराज खनाल जिल्लाके १८ स्थानीय तह सहित सब प्रादेशिक आ संघीय कार्यालयसबके लेखापरीक्षण करेके बतएले हए । आसीन ५ गतेभित्र कार्य सम्पन्न करेके लक्ष्यसहित तीनगो टोली काम सुरु करचुकल आ जल्दी चौथा टोली भि रौतहट पुगेके हुन जानकारी देले हए । लेखापरीक्षण सुरु करेसे पहिले जिल्लाके सरकारी कार्यालयके प्रमुख आ लेखा प्रमुखसबके संयुक्त बैठक कालहु सम्पन्न भेल रहे । बैठकमे प्रमुख जिल्ला अधिकारी विनोदकुमार खड्का लेखापरीक्षणमे पूर्ण सहयोग करेला निर्देशन देलन । हुन लेखापालके अभावसे एके व्यक्ति पाचगो कार्यालयके जिम्मेवारी सम्हालेके बाध्यता रहल आ येसे सुशासनमे चुनौती थपाएल बतएलन ।

हुन थपलन, “लेखापालसब कार्यालयमे नियमित नबइठेके आ बाहरेसे काम करेके गुनासो गम्भीर हए ।” कार्यक्रममे स्थानीय तहके प्रमुख, लेखा कर्मचारी, महालेखा परीक्षकके टोली आ सुरक्षा निकायके प्रतिनिधिसबके उल्लेखनीय सहभागिता रहल रहे ।